د کندز ولایت له چاردرې ولسوالۍڅخه ترلاسه شوی خبر وایي،چې تېره ورځ د خونکارو اربکیانو په لاس یو تن مظلوم بزګر په شهادت رسېدلی.

د سیمې خلک وایي،دا بزګر په خپله کرونده کې پر کار لګیا و، چې اربکیانو ورته راغلي او تر وهلو-ډبولو وروسته یې ځای پر ځای شهید کړی.

د کندز د په اصطلاح امنیې قومندانۍ ویاند سرور حسیني هم د پېښي پخلی کړی.

خلک دا هم وايي ،چې په سېمه کې د اربکیانو ظلم او وحشت تر سپږمو ور وستلي. ددوی په وینا دا لومړی ځل نه دی چې د دوی یو بې ګناه،بې وسه او بې وزله بزدور شهید کېږي. بلکي ددوی ډېر مخور ،علماء او مخکښ سپین روبي د شریرو اربکیانو په لاس بې عزته شوي او وژل شوي.

د یادونې وړ ده چې په شمال کې د نورو سېمو په پرتله د کندز خلک د اربکي ملېشو له رنځه سخت کړیږي او وخت ناوخت ترې د خلکو غوغا راپورته کېږي. په دې لړ کې څه موده وړاندې اربکیانو په دشت ارچې ولسوالۍ کې هم دوه بزګران په دې جرم په شهادت ورسول؛چي عشر یې نه ورکاوه.